Pagsasamantala wawakasan ng mga mapagsamantala?

ed cartoon web

Sa darating na Lunes Agusto 26, araw ng pag-alala sa mga bayani ng bansa, isang malaking pagtitipon ang nakakasa upang isigaw ang nagkakaisang bugso ng damdamin ng masang Pilipino. Ang mithiin nila: tanggalin na ang Pork Barrel, parusahan ang mga sangkot sa Priority Development Assistance Fund (PDAF) scam at magkaroon ng malinaw at bukas na paggamit ng pondo ng bayan.

Nagsimula lamang sa maliit na ideya ang magkaroon ng ‘Million People March’ sa Luneta — isang pangugunang sinilaban ng pagkayamot dahil sa walang habas na paglustay ng kaban ng bayan. Mga ordinaryong mamamayan ang dadagsa sa Luneta dahil sa labis na galit na nararamdaman bunsod ng naglalabasang isyu patungkol sa COA report, kay Janet Napoles at sa Pork Barrel.

Mabilis na kumalat sa social media ang panawagang magkaisa sa Luneta, ngunit naging mabilis din ang mga mapagsamantala upang makibahagi para maisingit ang kanilang sariling agenda o ‘di kaya’y dakmain ang pagkakataong maging kilala. Sa unang naging pagtitipon ng tinaguriang ‘reluctant host’ na si Peachy Rallonza-Bretaña at mga diumano’y volunteer, kapansin-pansin ang pagsulpot ng mga taong hindi man lang lantarang nagdeklara sa social media na sila ay sasama, mga personalidad na may malinaw na interes at ibang adhikain.

Hindi naman masama na sila ay makibahagi sa nasabing pagtitipon, lalo na kung sila’y kaisa natin sa adhikaing tapusin na ang Pork Barrel, ngunit sa kabila ng panawagan ng karamihan na huwag lagyan ng kulay ang pagtitipon ay kita na na ito ay hindi na mapipigilan at sadya nang makukulayan. May mga nagsasabing nahaluan na ng ‘yellow agenda’ ang nasabing ‘Million People March’ ng mga taong isinusulong ang interes ng administrasyon; may mga makakaliwa naman na ang layunin ay patalsikin ang pangulo; at may mga nagnanais na itulak ang kanilang adbokasya at iba pa.

Nakalulungkot lamang na mismong si Peachy ay di alam na siya ay nagagamit na. Mabilis ang pagbakod sa kanya ng mga taong may ibang layunin. At ang higit na nakababahala ay walang kaalam-alam si Peachy na siya ang nakapronta, habang ang mga taong nakapagpasok na ng kanilang sariling agenda ay nasa likod lamang.

Tila isang malaking problema na talaga sa lipunan ang ganitong uri ng panuntunan — problema na kahit pa tuluyan nang matanggal ang Pork Barrel at maparusahan ang mga sangkot — mananatili ang mga ugaling may pangsariling interes, makasarili at manggagamit, na siyang patuloy na maglulugmok sa bayan. Kawalan ng pagmamahal sa kapwa at kawalan ng moralidad ang tunay na problema ng bayan, moralidad na siyang tila nawawala na sa mga karaniwang tao at higit sa mga nagsisilbi sa pamahalaan.

Gaya na lamang ng mga nagiging hindi malinaw na pagtugon sa panawagan. Ang sagot ng administrasyong Pnoy: “ayusin” lamang ang sistema ng pagbibigay ng Pork Barrel — na napatunayang nang nagiging ugat ng katiwalian — sa pamamagitan ng pagtatayo ng Inter-Agency Anti-Graft Coordinating Council na tutugon diumano sa malawakang korapsyon at iimbestiga sa lehislatura na una nang ginawa ng Senado. Kalat na sa pamahalaan ang mapagsamantala, ngunit ang pamahalaan pa rin ang siyang magwawakas sa pagsamantala?

Nakatatawang isipin, ngunit wala ni isa sa mga ito ang nagbibigay sa taongbayan ng tunay na pagkakataon. Ang mga hakbang na ito ay hamak lamang na pagtalikod sa ninanais ng sambayanan. Kung ang mga mapagsamantala sa bayan ang siya ring tatayo upang solusyunan ang hinaing ng mamamayan ‘di kaya na malinaw na panloloko lamang ito?

Hamon ang panawagang tapusin na ang Pork Barrel higit sa lahat kay pangulong Noynoy Aquino. Ang “daang matuwid” ay tila pagkalimot sa gusto ng kanyang mga ‘boss’, pagtalikod sa hinaing ng kanyang mga ‘boss’ at pagtutol sa sigaw ng kanyang mga ‘boss.’ Patunayan niyo, mahal na Pangulo, hindi lamang sa salita, higit sa lahat, sa gawa at aksyon na ang katapatan niyo ay nasa sambayanang Pilipino.

Sa Lunes patuloy pa rin ang pagtitipon ng sambayanan at patuloy pa rin ang pagalab ng damdamin. Sa ginawang hakbang ng pangulo na diumano’y pagtanggal sa Pork Barrel tila pangalan lamang ang siyang matatanggal. Sa ganitong hakbang ng pangulo pinakikita lamang na siya ay makikinig lamang kung malawak na ang galit ng mamamayan.

Sa tunay na pagbabago kasama na rito ang Freedom of Information (FOI) na siyang mabibigay ng sa atin ng pagkakataon mabulat-lat ang mga transaksyon ng gobyerno. Para sa ating mga kababayan, maraming salamat at tayo ay nagkakaisa muli.

You May Also Like